धनगढी– नेकपा एमालेका स्थायी कमिटि सदस्य तथा केन्द्रिय प्रचार तथा प्रकाशन विभाग प्रमुख राजेन्द्र गौतमले सरकारसंग दुई तिहाइ भएको सुनिश्चितता भएसंगै संविधान संशोधनको कार्य अघि बढाउने बताएका छन् ।
बिहिबार धनगढीमा नेपाल प्रेस चौतारीले आयोजना गरेको पत्रकार सम्मेलनमा गौतमले सरकारसंग अहिले दुई तिहाइ नभएकोले संविधान संशोधनको कार्य अघि बढ्न नसकेको बताएका हुन् ।
‘प्रमुख प्रतिपक्षी दलहरुले संविधान संशोधनलाई सत्ता प्राप्तीको सिढी भनिरहेका छन् । त्यसो होइन् । संविधानका चुनौतिहरु अहिले सरकारले अध्ययन गरिरहेको छ’ उनले भने –‘ हरेक दश वर्षमा संविधान संशोधन हुने गर्छ । संविधान जारी भएको नौ वर्ष बढी भएको छ । अहिले सरकारसंग एक तिहाइमात्र छ । जुन दिन दुहाई तिहाई भएको सुनिश्चितता हुन्छ । त्यही समयमा संशोधन अघि बढ्छ ।’
उनले अहिलेको गठबन्धनमा संविधान संशोधन र अर्थतन्त्रमा आएको गिरावटलाई लयमा फर्काउने सहमति भएको बताए । उनले भने –‘अर्थतन्त्र क्रमिक रुपमा सुधार भइसकेका छन् । सरकारले राजश्व संकलनमा सुधार गरेको छ ।’ उनले सुधारका काम गर्न अध्यादेश ल्याएको बताउँदै –‘अहिले सरकारले संसद बैठक आह्वान गरिसकेको छ ।’ उनले वामदेव गौतमसंग सहकार्य गर्दै पार्टी अघि बढ्ने निर्णय गरेको बताए । उनले भने –‘वामदेव ज्यूसंग एकता अभियान चलाइरहनुभएको थियो । उहाँको अभियानमा संगै यात्रा गर्ने सहमति गरेका छौं । उहाँले के काम गरिरहनुभएको छ ? उहाँको अभियान कहाँ पुगेको छ ? कुन–कुन जिल्लामा संयन्त्र बनेको छ ? कति कार्यकर्ता उहासंग छन र त्यसको व्यवस्थापन कसरी भइरहेको छ भन्ने टुङ्गो नलगाई निर्णय लिने अवस्थामा छैन ।’
उनले डाक्टर भीम रावल पार्टीको नेता भएको बताउँदै –‘उहाँले अध्यक्षमा लड्नुभयो । पराजय व्यहोरेपछि पार्टी आफै छाडेर जानुभएको हो । उहाँलेनै सामान्य सदस्य नरहने बताएका हुन् ।’
