कैलाली। यात्रुहरूको सुविधा र सुरक्षित यात्रालाई मध्यनजर गर्दै सुन्दर सुदूरपश्चिम यातायात प्रालिले धनगढीदेखि दार्चुलाको गोकुलेश्वरसम्म दिवा सेवा सञ्चालनमा ल्याएको छ।
प्रालिका अध्यक्ष पदमराज सापकोटाका अनुसार धनगढी बसपार्कबाट दैनिक बिहान ६ बजे गोकुलेश्वरतर्फ र गोकुलेश्वरबाट बिहान ७ बजे धनगढीका लागि गाडी छुट्ने व्यवस्था गरिएको छ।
हाललाई दुई वटा १६ सिटे विद्युतीय (ईभी) गाडीमार्फत सेवा सुरु गरिएको व्यवसायी अर्जुनदेव भट्टले जानकारी दिए।
यात्रुहरूको चाप र मागलाई ध्यानमा राख्दै आगामी दिनमा गाडी संख्या थप गरिँदै जाने उनको भनाइ छ। करिब डेढ करोड रुपैयाँको लगानीमा उक्त सेवा सुरु गरिएको हो।
धनगढी–गोकुलेश्वर एकतर्फी यात्रु भाडादर १,२५० रुपैयाँ तोकिएको छ। सेवामा एसी, हिटरलगायत सुविधा उपलब्ध छन् भने एक पटकको चार्जमै गन्तव्यसम्म पुग्न सक्ने क्षमताका गाडी सञ्चालनमा ल्याइएको जनाइएको छ।
विद्युतीय सवारीमार्फत सुरु गरिएको यस सेवाले यात्रुलाई सहज, सुरक्षित र वातावरणमैत्री यात्रा अनुभव प्रदान गर्ने विश्वास लिईएको अध्यक्ष सापकोटाले बताए ।
