धनगढी– कैलालीको धनगढीमा आजदेखि चौथो सिसिएस प्लस टु कप अन्तरविद्यालय खुल्ला पुरुष फुटबल प्रतियोगिता औपचारिक रूपमा सुरु हुने भएको छ । सिसिएस प्लस टु स्कुलको आयोजनामा सञ्चालन हुन लागेको यो प्रतियोगिता विद्यार्थीहरूको शारीरिक, मानसिक तथा नैतिक विकास गर्दै खेलकुदमार्फत अनुशासन, नेतृत्व र टिमवर्कको भावना विकास गर्ने उद्देश्यका साथ आयोजना गरिने भएको हो ।
विगत केही वर्षयता निरन्तर रूपमा आयोजना हुँदै आएको यस प्रतियोगिताले सुदूरपश्चिम प्रदेशमा विद्यालयस्तरीय फुटबलको विकासमा महत्वपूर्ण योगदान पु¥याउँदै आएको आयोजकको भनाइ छ । खेलकुदलाई शिक्षा प्रणालीको अभिन्न अंगका रूपमा स्थापित गर्न तथा लुकेका प्रतिभाहरूलाई उजागर गर्ने लक्ष्यसहित प्रतियोगिता आयोजना गरिएको सिसिएस प्लस टु स्कुलले जनाएको छ ।
प्रतियोगिताको तयारी र व्यवस्थापनका विषयमा जानकारी दिन मंगलबार धनगढीमा पत्रकार सम्मेलनको आयोजना गरिएको थियो । सम्मेलनमा बोल्दै आयोजकले प्रतियोगिताको सम्पूर्ण तयारी पूरा भइसकेको र खेल सञ्चालनका लागि आवश्यक सबै पूर्वाधार, सुरक्षा तथा व्यवस्थापन पक्षलाई मजबुत बनाइएको जानकारी दिए । प्रतियोगिताको उद्घाटन सुदूरपश्चिम प्रदेश खेलकुद परिषद्का सदस्य–सचिव लोकबहादुर खड्का (रबी)ले गर्ने कार्यक्रम तय भएको छ ।
विद्यालय व्यवस्थापन समितिका अध्यक्ष हरि रेग्मीका अनुसार प्रतियोगिता माघ २७ गतेसम्म सञ्चालन हुनेछ । प्रतियोगितामा आयोजक विद्यालयबाट दुई टिमसहित कुल २२ वटा विद्यालयका टिमहरूले सहभागिता जनाउने छन् । यसले प्रतियोगितालाई अझ प्रतिस्पर्धात्मक र रोमाञ्चक बनाउने अपेक्षा गरिएको छ ।
रेग्मीले विद्यालयस्तरीय खेलकुदले विद्यार्थीहरूलाई पढाइसँगै अनुशासन, समय व्यवस्थापन र नेतृत्व क्षमतामा अब्बल बनाउने बताए । ‘पढाइ मात्र होइन, विद्यार्थीहरूको सर्वाङ्गीण विकासका लागि खेलकुद अत्यन्त आवश्यक छ,’ उनले भने, ‘यस्ता प्रतियोगिताले विद्यार्थीहरूलाई भविष्यका लागि तयार पार्ने महत्वपूर्ण भूमिका खेल्छन् ।’
प्रतियोगितालाई आकर्षक र प्रेरणादायी बनाउन पुरस्कार राशिलाई पनि उल्लेखनीय बनाइएको छ । प्रतियोगितामा प्रथम स्थान हासिल गर्ने टिमले नगद ९१ हजार रुपैयाँसहित ट्रफी प्राप्त गर्नेछ भने दोस्रो हुने टिमलाई नगद ५१ हजार रुपैयाँ, ट्रफी, मेडल तथा प्रमाणपत्र प्रदान गरिनेछ । यसका अतिरिक्त व्यक्तिगत विधातर्फ पनि विभिन्न पुरस्कारहरूको व्यवस्था गरिएको छ ।
उत्कृष्ट खेलाडीलाई नगद ५ हजार रुपैयाँ प्रदान गरिनेछ भने उत्कृष्ट गोलकर्तालाई २ हजार ५ सय रुपैयाँ पुरस्कार दिइनेछ । त्यस्तै उत्कृष्ट गोलरक्षकले पनि २ हजार ५ सय रुपैयाँ नगद प्राप्त गर्नेछ । प्रतियोगिताको कुनै खेलमा ह्याट्रिक गर्ने खेलाडीलाई १ हजार रुपैयाँ पुरस्कार दिइने व्यवस्था गरिएको छ भने प्रत्येक खेलको म्यान अफ द म्याच घोषित खेलाडीलाई १ हजार रुपैयाँ नगद पुरस्कार प्रदान गरिनेछ ।
