धनगढी– यहाँ नेकपा एमालेका प्रतिनिधि सभा उम्मेदवार द्वारिका प्रसाद न्यौपानेले कैलाली–१ का लागि आफ्नो चुनावी घोषणापत्र सार्वजनिक गरेका छन । स्थानीय अगुवा, पार्टी कार्यकर्ता र सर्वसाधारणको उपस्थितिमा आयोजित कार्यक्रममा न्यौपानेले वर्षौंदेखि उपेक्षित यस क्षेत्रका समस्या अब संसद्मा बलियो रूपमा उठाउने प्रतिबद्धता व्यक्त गरेका हुन ।
घोषणापत्रमा स्थानीय विकास, रोजगारी सिर्जना, शिक्षा र स्वास्थ्य सुधार, सुशासन तथा सामाजिक न्यायलाई मुख्य प्राथमिकतामा राखिएको छ । न्यौपानेले कैलाली–१ ले प्रतिनिधि त पाएको तर आफ्नो मुद्दा प्रभावकारी रूपमा उठाउन नसकेको उल्लेख गर्दै अब यो अवस्था बदल्ने समय आएको बताए ।
उम्मेदवार द्वारिका प्रसाद न्यौपाने भन्छन –‘कैलाली–१ ले प्रतिनिधि त पायो, तर आवाज पाउन सकेन । अब संसद्मा पुगेर यहाँका नागरिकका समस्या मजबुत रूपमा उठाउने समय आएको छ ।’
घोषणापत्रमा सडक, सिँचाइ, खानेपानी, शिक्षा र स्वास्थ्यजस्ता आधारभूत आवश्यकतामा अझै अपेक्षित विकास हुन नसकेको उल्लेख गरिएको छ । न्यौपानेले प्रतिनिधि सभामा पुगेर संघीय सरकारबाट यस क्षेत्रका लागि पर्याप्त बजेट र दीर्घकालीन योजना ल्याउने प्रतिबद्धता जनाए ।
रोजगारी सिर्जनालाई घोषणापत्रको मेरुदण्डका रूपमा प्रस्तुत गरिएको छ । ठूलो संख्यामा युवा रोजगारीका लागि भारत र तेस्रो मुलुक जान बाध्य भएको अवस्थालाई अन्त्य गर्न स्वदेशमै रोजगारीका अवसर सिर्जना गरिने उल्लेख छ । कृषि आधुनिकीकरण, स्थानीय उत्पादनमा आधारित उद्योग र थारू तथा स्थानीय संस्कृतिमा आधारित पर्यटन प्रवद्र्धनमार्फत रोजगारी बढाइने योजना अघि सारिएको छ ।
द्वारिका प्रसाद न्यौपानेले भने –‘हाम्रो लक्ष्य युवालाई विदेश जान बाध्य बनाउने होइन, यहीँ सम्मानजनक रोजगारी दिने हो ।’
शिक्षा क्षेत्र सुधारलाई पनि घोषणापत्रमा विशेष प्राथमिकता दिइएको छ । सामुदायिक विद्यालयको गुणस्तर सुधार, प्राविधिक तथा व्यावसायिक शिक्षाको विस्तार र युवालाई सीपमूलक तालिम दिने नीति अघि सारिएको छ । शिक्षासँगै रोजगारी जोडिने खालको कार्यक्रम लागू गरिने न्यौपानेको भनाइ छ ।
स्वास्थ्य सेवाको पहुँच ग्रामीण तथा सीमान्तकृत बस्तीमा अझै कमजोर रहेको उल्लेख गर्दै आधारभूत स्वास्थ्य सेवा सबै नागरिकसम्म पु¥याइने प्रतिबद्धता घोषणापत्रमा गरिएको छ । स्वास्थ्य चौकी र अस्पतालको स्तरोन्नति, दक्ष स्वास्थ्यकर्मीको व्यवस्था तथा विपन्न वर्गका लागि निःशुल्क उपचारको दायरा विस्तार गर्ने योजना समेटिएको छ ।
सुशासन र भ्रष्टाचार नियन्त्रण घोषणापत्रको अर्को महत्वपूर्ण पक्ष हो । सार्वजनिक खर्चमा कडा निगरानी, पारदर्शी कानुन निर्माण र जनउत्तरदायी शासन प्रणाली स्थापना गर्न संसद्मा पहल गरिने न्यौपानेले बताए ।
द्वारिका प्रसाद न्यौपानेले भने –‘जनताको करको पैसा सही ठाउँमा खर्च हुनुपर्छ । भ्रष्टाचारविरुद्ध शून्य सहनशीलता अपनाइन्छ ।’
घोषणापत्रमा महिला, दलित, थारू समुदाय, आदिवासी जनजाति, अपाङ्गता भएका व्यक्ति तथा सीमान्तकृत समुदायको हक–अधिकार सुनिश्चित गर्न विशेष जोड दिइएको छ । साथै युवालाई केन्द्रमा राखेर सीप विकास, उद्यमशीलता, खेलकुद र नवप्रवर्तनमा लगानी बढाइने उल्लेख छ । पर्यावरण संरक्षण र दिगो विकासलाई पनि घोषणापत्रमा समेट्दै विकासका नाममा प्राकृतिक स्रोतको दोहन होइन, संरक्षणसँगै समृद्धि हासिल गर्ने नीति लिइने जनाइएको छ ।
घोषणापत्र सार्वजनिक गर्दै उम्मेदवार न्यौपानेले सांसद निर्वाचित भएमा आफूले पाउने भत्ता र पारिश्रमिक गरिब तथा विपन्न परिवारका बालबालिकाको शिक्षामा खर्च गर्ने दाबीसमेत गरेका छन । अब मतदाताले यी प्रतिबद्धतालाई कसरी मूल्याङ्कन गर्छन् भन्ने कुरा भने निर्वाचन परिणामले नै देखाउनेछ ।
