चैत महिनामा मनाइने चैती छठ पर्वको अवसरमा धनगढीमा विशेष तयारी गरिएको छ। हिन्दू धर्मावलम्बीहरूले सूर्य देव र छठी मइयाको आराधना गर्दै मनाउने यो पर्व विशेषगरी तराई क्षेत्रमा श्रद्धा र भक्तिका साथ मनाइन्छ।
श्री छठ पूजा सेवा समिति धनगढी कैलालीका अनुसार धनगढीको भन्सार क्षेत्रमा रहेको मोहनाघाटमा यस वर्ष पनि चैती छठ पर्व भव्य रूपमा मनाइँदैछ। पर्वअन्तर्गत हिजो चैत ८ गते “नहाय-खाय” सम्पन्न भएको छ भने आज ९ गते “खर्ना” मनाइँदैछ।
भोलि चैत १० गते साँझ अस्ताउँदो सूर्यलाई अर्घ्य दिने कार्यक्रम रहेको छ। सोही दिन भजन-कीर्तन कार्यक्रमसमेत आयोजना गरिने आयोजकले जानकारी दिएका छन्। त्यसैगरी चैत ११ गते बिहान उदाउँदो सूर्यलाई अर्घ्य दिँदै पर्व समापन गरिनेछ, जसलाई “पालन” पनि भनिन्छ।
“हामीले हरेक वर्षझैँ यस वर्ष पनि मोहनाघाटमा व्यवस्थित रूपमा छठ पर्व मनाउने तयारी गरेका छौँ। भक्तजनलाई सहज र सुरक्षित रूपमा पूजा गर्न मिल्ने वातावरण बनाएका छौँ।”
छठ पर्वमा सूर्य देवतालाई जीवन, ऊर्जा र स्वास्थ्यको स्रोत मानी पूजा गर्ने गरिन्छ। अस्ताउँदो र उदाउँदो सूर्यलाई अर्घ्य दिने विशेष परम्परा रहेको छ।
यस पर्वमा महिलाहरूले विशेषगरी निर्जला व्रत बस्ने गर्दछन् भने कतिपय पुरुषहरू पनि व्रतमा सहभागी हुने गर्छन्। करिब ३६ घण्टासम्म पानीसमेत नपिई बसिने यो व्रतलाई अत्यन्त कठिन मानिन्छ।
पूजाका लागि प्रयोग हुने सम्पूर्ण सामग्री जस्तै फलफूल, प्रसाद र पानी शुद्ध र सफा राखिने गरिन्छ। साथै नदी, पोखरी तथा घाटहरू सफा गरेर पूजा गरिने भएकाले यस पर्वले प्रकृतिप्रति सम्मान र संरक्षणको सन्देश पनि दिन्छ।
चैत ११ गते बिहान प्रसाद वितरण कार्यक्रमसमेत राखिएको आयोजकले जनाएको छ। श्रद्धा, भक्ति र संस्कृतिको संगमका रूपमा रहेको छठ पर्वले समुदायमा एकता र सकारात्मक ऊर्जा फैलाउने विश्वास गरिएको छ।
