धनगढी- धनगढीबाट प्रकाशित पश्चिम टुडे दैनिक र पश्चिम टुडे अनलाइनमा प्रकाशित समाचार र लेखका विषयलाई लिएर उक्त अनलाइनका सम्पादक दीर्घराज उपाध्यायलाई सामाजिक सञ्जाल फेसबुकमार्फत धम्क्याइएको घटनाप्रति कैलालीका पाँचवटा पत्रकार संगठनले संयुक्त रूपमा विज्ञप्ति जारी गर्दै गम्भीर ध्यानाकर्षण जनाएका छन्।

समाचारको विषयमा ‘फेक आइडी’ बनाएर सम्पादक उपाध्यायलाई धम्क्याउने, उनको परिवारलाई लक्षित गरी अनर्गल टिप्पणी गर्ने र मानसिक तनाव दिने कार्य भएको छ। सामाजिक सञ्जालमा पत्रकारिता विरुद्ध नकारात्मक टिप्पणी गर्दै सार्वजनिक स्थलका ढुंगामा ‘पत्रुकार’ लेख्ने जस्ता घटनाहरू दोहोरिनु प्रेस स्वतन्त्रतामाथि आक्रमण भएको विज्ञप्तिमा उल्लेख गरिएको छ।

पश्चिम टुडे डटकम अनलाइनमा फागुन ५ गते ‘धनगढीको उज्यालो भ्रम र वास्तविकता’ शीर्षकको लेख, ‘मेयरले हाम्रो घाँटी निमोठे, विस्थापितहरू भन्छन्, बाँच्न गाह्रो भयो, विष खान पनि पैसा छैन’ शीर्षकको समाचार र फागुन ६ गते ‘धनगढीको उज्यालो भ्रम र वास्तविकता भाग २’ शीर्षकको लेख प्रकाशित भएका थिए। यही समाचारलाई लिएर पत्रकार उपाध्यायलाई लक्षित गरी धम्कीपूर्ण गतिविधि भइरहेका छन्।

पत्रकार संगठनहरूले प्रेस तथा अभिव्यक्ति स्वतन्त्रताविरुद्ध भएका यस्ता कार्यको निन्दा गर्दै असहमति जनाउने संवैधानिक बाटो कानुनी उपचार भए पनि धम्की, मानसिक तनाव दिने, भ्रम फैलाउने र पत्रकारलाई हतोत्साहित गर्ने कार्य अस्वीकार्य रहेको बताएका छन्। उनीहरूले लोकतन्त्रमा सार्वजनिक पदमा रहेकाहरू माथि प्रश्न उठाउन पाइने र त्यसकै कारण पत्रकारलाई धम्क्याउनु निन्दनीय भएको पत्रमा उल्लेख गरेका छन्।

नेपाल प्रेस युनियन कैलालीका अध्यक्ष सिताराम ओझा, प्रेस चौतारी कैलालीका अध्यक्ष जनक बिष्ट, प्रेस सेन्टर कैलालीका अध्यक्ष सुरेन्द्र ताम्राकार, समाजवादी प्रेस संगठन कैलालीका अध्यक्ष लक्ष्मीप्रशाद जैशी र नेपाल आदिवासी जनजाति पत्रकार महासंघ फोनिज कैलालीका अध्यक्ष राम दहितले संयुक्त रूपमा विज्ञप्ति जारी गर्दै घटनाको छानबिन गरी दोषीलाई कानुनी दायरामा ल्याउन प्रशासनसँग माग गरेका छन्।

दोषीमाथि कारबाही नभए चरणवद्ध आन्दोलन गर्ने चेतावनी पनि दिएका छन्।