सुदूरपश्चिम प्रदेशका मुख्यमन्त्री कमल बहादुर शाहले बोलाएको सर्वदलीय बैठक बिना निष्कर्ष टुङ्गिएको छ। बैठकमा सत्ता गठबन्धनका घटक दल र प्रतिपक्षी दलका प्रतिनिधिहरू उपस्थित भए पनि महत्वपूर्ण निर्णयमा पुग्न सकेनन्। मुख्यमन्त्री शाहले प्रदेश सभा बैठक अवरुद्ध गर्ने प्रतिपक्षी दललाई बैठकमा बोलाएका थिए।
बैठकमा नेपाली काङ्ग्रेसका प्रमुख सचेतक विक्रमसिंह धामी, नेकपा एमालेका पूर्व मुख्यमन्त्री राजेन्द्रसिंह रावल, नागरिक उन्मुक्ति पार्टीका नेता घनश्याम चौधरी, नेकपा माओवादी केन्द्रका मानबहादुर धामी र अन्य दलका नेता तथा सचेतकहरू सहभागी थिए। मुख्यमन्त्री शाहले प्रतिपक्षी दललाई संसद् सुचारु गर्न आह्वान गरेका थिए।
प्रतिपक्ष दलले अनावश्यक खर्च कटौती गर्ने प्रस्ताव राखेपछि माओवादी दलका नेता मानबहादुर धामीले सरकारको अनावश्यक खर्च कटौती गर्नुपर्ने आवश्यकता औंल्याए। यद्यपि, एमालेसँगको असहमति पछि बैठक स्थगित भएको हो।
बैठकमा सत्तापक्षका दलका नेताहरूले सेवा सुविधाको कटौती, गोष्ठी र सेमिनारहरू हटाउने जस्ता विषयमा छलफल गरेका थिए। बैठक ११ बजेदेखि सुरु भएर ३ बजेसम्म चलेपनि ठोस सहमति नजुटेपछि स्थगित भएको हो।
बैठकमा सामाजिक विकास मन्त्री मेघराज खड्का र डा। गणेश सिंह पनि उपस्थित थिए। बैठकको क्रममा सेती प्रादेशिक अस्पताललाई गाभेर मेडिकल विश्वविद्यालय सञ्चालन गर्ने विषयमा पनि छलफल भएको थियो।
