धनगढी– नेपाल–भारत मैत्री संघ जिल्ला शाखा कैलालीले मित्र राष्ट्र भारतको ७७ औं गणतन्त्र दिवसको अवसरमा अपाङ्ग छात्र–छात्राहरुलाई कम्बल वितरण गरेको छ । नेपाल–भारतबीचको ऐतिहासिक मित्रता, सामाजिक सद्भाव र मानवीय सहयोगलाई थप मजबुत बनाउने उद्देश्यसहित संघले सामाजिक उत्तरदायित्व अन्तर्गत उक्त कार्यक्रम आयोजना गरेको हो ।
नेपाल–भारत मैत्री संघ केन्द्रीय कार्यालयको आयोजनामा गोदावरी नगरपालिका वडा नम्बर २ मा अवस्थित सुदूरपश्चिम समाजसेवी आधारभूत विद्यालयमा एक विशेष समारोहबीच कम्बल वितरण गरिएको थियो । कार्यक्रममा अध्ययनरत अपाङ्ग विद्यार्थीहरुलाई जाडो मौसममा राहत पुग्ने उद्देश्यले कम्बल प्रदान गरिएको आयोजकले जनाएको छ ।
समारोह नेपाल–भारत मैत्री संघका अध्यक्ष राजीव गुप्ताको अध्यक्षतामा भएको थियो । कार्यक्रममा संघका केन्द्रीय सदस्यहरू प्रदीप बैद्ध, गीता कुमारी गौतम, शुभाष अग्रवालको उपस्थिति रहेको थियो । साथै अत्तरियास्थित विद्यालयकी प्रिन्सिपल रितु पाण्डे साहु, संघका सदस्य बिमल बंसल, स्थानीय वडा सदस्यहरू, विद्यालयका शिक्षक–शिक्षिकाहरू तथा अभिभावकहरूको पनि उल्लेख्य सहभागिता रहेको थियो ।
कार्यक्रमलाई सम्बोधन गर्दै अध्यक्ष राजीव गुप्ताले नेपाल र भारतबीचको सम्बन्ध केवल राजनीतिक मात्र नभई सामाजिक, सांस्कृतिक र मानवीय आधारमा समेत गहिरो रहेको बताए । उनले अपाङ्ग विद्यार्थीहरूलाई लक्षित गरी गरिएको यो सहयोगले उनीहरूको आत्मविश्वास बढाउने र समाजमा सकारात्मक सन्देश प्रवाह गर्ने विश्वास व्यक्त गरे ।
कार्यक्रमको अन्त्यमा सहभागीहरूले भारतको गणतन्त्र दिवसको शुभकामना आदान–प्रदान गर्दै नेपाल–भारत मित्रता अझ प्रगाढ बनाउँदै लैजानुपर्नेमा जोड दिएका थिए । सामाजिक सेवामार्फत दुई देशबीचको सम्बन्ध सुदृढ बनाउने नेपाल–भारत मैत्री संघको पहल स्थानीय स्तरमा प्रशंसनीय मानिएको छ ।
