नेकपा एमालेका सचिव लेखराज भट्टले अत्तरियामा मंगलबार आगलागी हुँदा केवल घर मात्र नभई उनका भावनात्मक स्मृति र ऐतिहासिक सामग्रीहरू जलेर नष्ट भएको बताएका छन्। पत्रकार सम्मेलनमा उनले भने, “आगलागीबाट करिब ९–१० करोडको क्षति भएको होला, तर भावनामा ठुलो चोट लागेको छ। यो घरमा युद्धका इतिहास, दुर्लभ किताब र बचपनका फोटोहरू थिए, ती सबै नष्ट भए।”
भट्टले आगलागी गराउने प्रयास निराधार आरोपमा भएको बताउँदै स्थानीय व्यक्तिहरूले मात्र यसमा संलग्न भएको स्पष्ट पारेका छन्। उनले भने, “भारतबाट वा बाहिरबाट आगो लगाउन आएका छैनन्, यसै क्षेत्रका हुन्। अहिले नाम भन्नु उपयोगी छैन, तर कारबाही हुनुपर्छ।”
साथै, भट्टले देश अहिले गम्भीर मोडमा पुगेको भन्दै जेन–जी आन्दोलनपछि राज्यको अस्तित्वमाथि चिन्ता व्यक्त गरेका छन्। उनले संविधान संकटमा पुगेको र राष्ट्रवादी नेतृत्वमाथि प्रहार भइरहेको बताए।
