धनगढीः सुदूरपश्चिम प्रदेशका मुख्यमन्त्री खगराज भट्टले प्रदेश मन्त्रिपरिषद्लाई पूर्णता दिएका छन्। नेपाली कम्युनिस्ट पार्टीबाट तीन मन्त्री र दुई राज्यमन्त्री नियुक्त भएसँगै प्रदेश सरकारको मन्त्रिपरिषद्ले पूर्णता पाएको हो।
मुख्यमन्त्री भट्टले भौतिक पूर्वाधार विकासमन्त्रीमा ओमविक्रम भाट ‘सरल’, उद्योग, पर्यटन, वन तथा वातावरणमन्त्रीमा प्रकाश रावल र आन्तरिक मामिला तथा कानुनमन्त्रीमा खुसीराम डगौरालाई नियुक्त गरेका छन्।
त्यस्तै, उद्योग, पर्यटन, वन तथा वातावरण राज्यमन्त्रीमा इन्दिरा गिरी र भौतिक पूर्वाधार विकास राज्यमन्त्रीमा जानकी कुँवर नियुक्त भएका छन्।
नवनियुक्त मन्त्रीहरूलाई सुदूरपश्चिम प्रदेश प्रमुख नजिर मियाँले पद तथा गोपनीयताको शपथ गराएका छन् भने राज्यमन्त्रीहरूलाई मुख्यमन्त्री भट्टले पद तथा गोपनीयताको शपथ गराएका हुन्।
यसअघि मुख्यमन्त्री भट्ट नियुक्त भएकै समयमा नेकपा एमालेबाट तीन मन्त्री र एक राज्यमन्त्री नियुक्त भएका थिए। एमालेबाट सन्तोषकुमारी थापा शर्मालाई सामाजिक विकासमन्त्री, चक्रबहादुर मल्ललाई आर्थिक मामिलामन्त्री, दमनबहादुर भण्डारीलाई भूमि व्यवस्था, कृषि तथा सहकारीमन्त्री र जानकी ऐर बमलाई आर्थिक मामिला राज्यमन्त्रीको जिम्मेवारी दिइएको थियो।
नयाँ नियुक्तिसँगै मुख्यमन्त्री खगराज भट्ट नेतृत्वको प्रदेश सरकारमा रहेका सबै मन्त्रालयको जिम्मेवारी टुंगिएको छ।
मन्त्रालयअनुसार जिम्मेवारी
मुख्यमन्त्री: खगराज भट्ट
सामाजिक विकास मन्त्रालय: सन्तोषकुमारी थापा शर्मा
आर्थिक मामिला मन्त्रालय: चक्रबहादुर मल्ल
भूमि व्यवस्था, कृषि तथा सहकारी मन्त्रालय: दमनबहादुर भण्डारी
आर्थिक मामिला राज्यमन्त्री: जानकी ऐर बम
भौतिक पूर्वाधार विकास मन्त्रालय: ओमविक्रम भाट ‘सरल’
भौतिक पूर्वाधार विकास राज्यमन्त्री: जानकी कुँवर
उद्योग, पर्यटन, वन तथा वातावरण मन्त्रालय: प्रकाश रावल
उद्योग, पर्यटन, वन तथा वातावरण राज्यमन्त्री: इन्दिरा गिरी
आन्तरिक मामिला तथा कानुन मन्त्रालय: खुसीराम डगौरा
मन्त्रिपरिषद्ले पूर्णता पाएसँगै अब प्रदेश सरकारका मन्त्रालयहरू नियमित रूपमा सञ्चालन हुने र सरकारको कामकारबाही थप प्रभावकारी हुने अपेक्षा गरिएको छ।
