१२ भदौ, काठमाडौं । बाढीका कारण प्रभावित पशुचौपायामा फैलिन सक्ने रोगको जोखिम मध्यनजर गर्दै कृषि, वन तथा पर्यावरण मन्त्रालयको प्राविधिक टोली नुवाकोट पुगेको छ ।
बाढी प्रभावित क्षेत्रमा पशु स्वास्थ्य सेवा र आवश्यक सहयोग उपलब्ध गराउने उद्देश्य सहित पुगेको उक्त टोलीले नुवाकोटका सहायक प्रमुख जिल्ला अधिकारीसँग भेटवार्ता गरेको छ ।
भेटमा टोलीले बाढी प्रभावित क्षेत्रमा पशुचौपाया उद्धार, राहत र स्वास्थ्य उपचारका लागि सञ्चालन भइरहेका गतिविधिबारे जानकारी गराएको थियो ।
त्यसैगरी प्राविधिक टोलीले नुवाकोटस्थित भेटेरिनरी अस्पताल तथा पशु सेवा विज्ञ केन्द्रका अधिकारीहरूसँग छलफल गर्दै पशुचौपायाका लागि आवश्यक पर्ने औषधि, खोप तथा अन्य स्वास्थ्य सामग्री हस्तान्तरण गरेको छ ।
बाढीपछि पशुचौपायामा विभिन्न संक्रामक रोगको जोखिम उच्च हुने भएकाले त्यसको रोकथाम र नियन्त्रणका लागि यी स्वास्थ्य सामग्री तथा खोप उपलब्ध गराइएको मन्त्रालयको टोलीले जनाएको छ ।
