सुदूरपश्चिम प्रदेशमा एन्टी रेबिज भ्याक्सिन (एआरभी) अभाव भएपछि कुकुर, बाँदरलगायत जनावरको टोकाइबाट प्रभावित बिरामीहरू निजी फार्मेसीबाट खोप खरिद गर्न बाध्य भएका छन्। संघीय सरकारले माघयता नयाँ खोप आपूर्ति नगर्दा प्रदेश सरकारले खरिद गरेको सीमित खोप पनि जेठको पहिलो सातामै सकिएको हो।
हाल प्रदेशका अधिकांश सरकारी स्वास्थ्य संस्थामा एआरभी खोप मौज्दात छैन। बिरामीले आफैं खोप किनेर ल्याएपछि मात्र स्वास्थ्य संस्थाले लगाइदिने व्यवस्था गरिएको छ। स्वास्थ्यकर्मीहरूले रेबिज प्राणघातक रोग भएकाले टोकाइपछि तत्काल खोप लगाउनुपर्ने बताउँदै खोप अभावले जनस्वास्थ्यमा गम्भीर जोखिम बढाएको चेतावनी दिएका छन्।
प्रदेश स्वास्थ्य आपूर्ति व्यवस्थापन केन्द्रले बजेट अभावका कारण स्थानीय तहलाई आफ्नै स्रोतबाट खोप व्यवस्थापन गर्न आग्रह गरेको भए पनि समस्या समाधान हुन सकेको छैन। सरोकारवालाले तत्काल खोप आपूर्ति सुनिश्चित गर्न र भविष्यमा यस्तो संकट दोहोरिन नदिन दिगो व्यवस्थापनको माग गरेका छन्।
