बैतडी – बैतडीको मेलौली नगरपालिका–२ कपर्तमा रहेको कोटेश्वर आधारभूत विद्यालयको निमित्त प्रधानाध्यापकमा हरु ओड नियुक्त भएकी छन् । विद्यालयका प्रधानाध्यापक धनीराम विक अनिवार्य अवकाशमा गएपछि मेलौली नगरपालिकाले असार ११ गतेदेखि लागू हुने गरी ओडलाई निमित्त प्रधानाध्यापकको जिम्मेवारी दिएको हो । विद्यालय व्यवस्थापन समितिको सिफारिसमा मेलौली नगरपालिकाको शिक्षा, युवा तथा खेलकुद शाखाले निर्णय गरेर उनलाई प्रधानाध्यापकको जिम्मेवारी दिएको थियो ।
३३ वर्षीया ओड मेलौली नगरपालिकाभित्रकै सबैभन्दा कम उमेरमा प्रधानाध्यापकको जिम्मेवारी सम्हाल्ने व्यक्ति बनेको बताइएको छ । स्नातक तह अध्ययन गरेकी उनी यसअघि सोही विद्यालयमा शिक्षकका रूपमा कार्यरत थिइन् ।
आफ्नै गाउँको विद्यालयको नेतृत्व गर्ने अवसर पाएकी ओडले विद्यालयको शैक्षिक गुणस्तर सुधार, विद्यार्थीको सिकाइ उपलब्धि वृद्धि, नियमित पठनपाठन तथा अभिभावकसँगको समन्वयलाई प्राथमिकतामा राखेर काम गर्ने बताएकी छिन ।
स्थानीयवासीले पनि युवा नेतृत्वले विद्यालयमा नयाँ ऊर्जा र सकारात्मक परिवर्तन ल्याउने अपेक्षा गरेका छन् ।
