१८ वर्षभन्दा कम उमेरका बालबालिकालाई दलको सदस्यता वितरण गरेको सार्वजनिक भएपछि राष्ट्रिय मानव अधिकार आयोगले रवि लामिछाने नेतृत्वको राष्ट्रिय स्वतन्त्र पार्टी (रास्वपा) लाई पत्राचार गरेको छ । बालबालिकालाई सदस्यता दिए–नदिएको यथाशीघ्र खुलाएर पठाउन भन्दै आयोगले रास्वपालाई पत्र पठाएको हो ।
१८ वर्षमुनिका बालबालिकालाई सदस्यता वितरण गर्नु मुलुकको कानुन र नेपालको अन्तर्राष्ट्रिय प्रतिबद्धताविपरीत हुने जिकिर गर्दै आयोगले ‘राष्ट्रिय मानव अधिकार आयोग ऐन, २०६८’ को दफा २१(१) बमोजिम जानकारी उपलब्ध गराउन भनेको छ । ‘१८ वर्षमुनिका बालबालिकालाई सो पार्टीबाट सदस्यता वितरण गरिएको भए, त्यस्तो कार्य प्रचलित नेपाल कानुन र नेपालको अन्तर्राष्ट्रिय प्रतिबद्धताविपरीत हुने हुँदा उनीहरुलाई पार्टी सदस्यता वितरण भए–नभएको यथाशीघ्र विस्तृत जानकारी उपलब्ध गराउन राष्ट्रिय मानव अधिकार आयोग ऐन, २०६८ को दफा २१(१) अनुसार अनुरोध गरिएको छ’,पत्रमा भनिएको छ ।
