कैलाली- कुनै समय सामान्यदेखि जटिल उपचारका लागि भारतका सीमावर्ती शहर वा काठमाडौं धाउनुपर्ने बाध्यता सुदूरपश्चिमका नागरिकको नियति जस्तै थियो। तर अहिले अवस्था फेरिएको छ। आधुनिक प्रविधि, विशेषज्ञ चिकित्सक र सुविधासम्पन्न अस्पतालहरूको विस्तारसँगै धनगढी सुदूरपश्चिमकै स्वास्थ्य सेवाको भरोसायोग्य केन्द्रका रूपमा स्थापित हुँदै गएको छ।पछिल्ला केही वर्षमा धनगढीमा सरकारी तथा निजी स्वास्थ्य संस्थाहरूले पूर्वाधार र सेवामा उल्लेखनीय विस्तार गरेका छन्। अहिले यहाँ एमआरआई, सिटी स्क्यान, डिजिटल एक्स–रे, अत्याधुनिक प्रयोगशाला परीक्षण, आईसीयू, एनआईसीयू, डायलाइसिस, एन्डोस्कोपी, सुत्केरी सेवा, नवजात शिशु उपचार, जटिल शल्यक्रिया तथा विशेषज्ञ परामर्श सेवा सहज रूपमा उपलब्ध छन्।
धनगढीमा रहेका सेती प्रादेशिक अस्पताल, कैलाली अस्पताल, निसर्ग अस्पताल, केयरटेकर अस्पताल, नोभा अस्पताल, धनगढी सिटी अस्पताल, अत्तरिया अस्पताल, मायामेट्रो अस्पताल, नवजीवन अस्पताल लगायतका स्वास्थ्य संस्थाले हजारौं बिरामीलाई दैनिक सेवा प्रदान गरिरहेका छन्। यी अस्पतालमा कार्यरत विभिन्न विधाका विशेषज्ञ चिकित्सक, नर्स तथा स्वास्थ्यकर्मीले सुदूरपश्चिमका साथै कर्णाली प्रदेशका नागरिकलाई समेत गुणस्तरीय उपचार सेवा उपलब्ध गराइरहेका छन्।
धनगढीमा स्वास्थ्य सेवाको पहुँच विस्तार भएसँगै कैलाली, कञ्चनपुर, डोटी, अछाम, बाजुरा, बझाङ, डडेल्धुरा, दार्चुला, बैतडी र कर्णाली प्रदेशका विभिन्न जिल्लाबाट समेत बिरामी उपचारका लागि धनगढी आउने क्रम निरन्तर बढ्दो छ। धनगढीसँगै सीमा जोडिएको भारतको उत्तरप्रदेशका विभिन्न स्थानबाट समेत बिरामीहरु आउने गरेका छन्। यसले उपचारका लागि भारत वा राजधानी काठमाडौं जानुपर्ने बाध्यता उल्लेखनीय रूपमा घटाएको छ। समय, खर्च र मानसिक तनावसमेत कम हुँदा स्थानीय नागरिक प्रत्यक्ष रूपमा लाभान्वित भएका छन्।
स्वास्थ्य क्षेत्रमा बढ्दो लगानीका कारण धनगढीमा नयाँ निजी अस्पताल तथा विशेषज्ञ स्वास्थ्य केन्द्र खुल्ने क्रम अझै जारी छ। यसले आगामी दिनमा थप विशेषज्ञ सेवा, अत्याधुनिक उपकरण र दक्ष जनशक्ति थपिने अपेक्षा गरिएको छ।
स्वास्थ्य क्षेत्रका जानकारहरूका अनुसार सरकारी र निजी क्षेत्रबीचको सहकार्य, आधुनिक प्रविधिको प्रयोग र विशेषज्ञ जनशक्तिको उपलब्धताले धनगढीलाई सुदूरपश्चिमकै मात्र होइन, देशकै उदीयमान ’स्वास्थ्य हब’ का रूपमा स्थापित गरिरहेको छ।
सुविधासम्पन्न अस्पताल, अनुभवी चिकित्सक, अत्याधुनिक उपकरण र सेवाप्रतिको बढ्दो विश्वासका कारण धनगढी आज उपचारको खोजीमा रहेका हजारौं बिरामीका लागि ’स्वास्थ्यको भरोसा’ बनेको छ।
