नेपाल कम्युनिस्ट पार्टी (बहुमत)ले पार्टीविरोधी गतिविधिमा संलग्न भएको आरोपमा अध्यक्ष मण्डलका सदस्य उदयबहादुर चलाउने ‘दीपक’लाई सम्पूर्ण जिम्मेवारीबाट मुक्त गरेको छ।
पार्टीले जारी गरेको वक्तव्यमा दीपकमाथि पार्टीको नीति, विधि र निर्णयविपरीत गतिविधि गरेको, पार्टीभित्र गुटबन्दी र विभाजनको प्रयास गरेको तथा षड्यन्त्रपूर्ण गतिविधिमा मुख्य भूमिका खेलेको आरोप लगाइएको छ।
पार्टीले यसअघि पनि केही नेताकार्यकर्ताले गैरजिम्मेवार ढंगले पार्टीविरोधी गतिविधि गर्दै आएको भन्दै समय–समयमा छलफल, बहस, स्पष्टीकरण र आत्मालोचनाको अवसर दिँदै आएको थियो। तर, चेतावनी र छलफलका बाबजुद पार्टीलाई फरक दिशातर्फ लैजाने, गुटबन्दी गर्ने र विभाजनकारी गतिविधि अघि बढाइएको पार्टीको निष्कर्ष छ।
पछिल्लो समय देश बाढी र विपद्को चपेटामा परेपछि राष्ट्रिय सम्मेलन स्थगित गरी पीडित जनताको उद्धार तथा राहतमा जुट्न पार्टीले अपिल गरेको थियो। तर, उक्त अपिल र पार्टीको सर्कुलरविपरीत गतिविधि गर्दै पार्टी कार्यालयलाई जानकारी नै नदिई बैठकका लागि परिपत्र जारी गरिएको वक्तव्यमा उल्लेख छ।
दीपकलाई पार्टी विधानको भाग ५, धारा २७ बमोजिम कारवाही गरिएकाे हाे । पार्टीले आफ्ना केन्द्रीय सदस्यहरूलाई अर्थवाद, षड्यन्त्रकारी, गुटवादी, विभाजनकारी, अवसरवादी तथा अराजकतावादी गतिविधिको भ्रममा नपर्न समेत अपिल गरेको छ। वक्तव्यमा पार्टीको निर्णयप्रति सबै नेता तथा कार्यकर्तालाई जिम्मेवार र अनुशासित बन्न आग्रह पनि गरिएकाे छ ।
