आईसीसीको मान्यता, लिस्ट ‘ए’ को दर्जा र डीआरएस प्रविधिको प्रयोगले यसपटकको एनपीएल थप प्रतिस्पर्धात्मक र स्तरीय बन्ने अपेक्षा
नेपाल क्रिकेट संघ (क्यान) का केन्द्रीय सदस्य धीरेन्द्र साउदले नेपाल प्रिमियर लिग (एनपीएल) सिजन–३ को टुर्नामेन्ट डाइरेक्टरको महत्त्वपूर्ण जिम्मेवारी पाएका छन्।
आगामी कात्तिक ९ गतेदेखि मंसिर ५ गतेसम्म कीर्तिपुरस्थित त्रिवि क्रिकेट मैदानमा सञ्चालन हुने एनपीएल सिजन–३ लाई व्यवस्थित, प्रतिस्पर्धात्मक र प्राविधिक रूपमा स्तरीय बनाउन साउदले महत्त्वपूर्ण भूमिका निर्वाह गर्ने अपेक्षा गरिएको छ।
यसपटकको एनपीएललाई अन्तर्राष्ट्रिय स्तरमा थप स्थापित गर्ने उद्देश्यसहित प्रतियोगिताको तयारीलाई भव्य रूपमा अगाडि बढाइएको छ। हालै अन्तर्राष्ट्रिय क्रिकेट परिषद् (आईसीसी) बाट स्वीकृति प्राप्त गरेको एनपीएलका यस सिजनका खेलले लिस्ट ‘ए’ क्रिकेटको मान्यतासमेत पाएका छन्। यसले प्रतियोगिताको आधिकारिकता र महत्त्वलाई थप उचाइ दिने अपेक्षा गरिएको छ।
त्यस्तै, एनपीएल सिजन–३ देखि नेपाल क्रिकेट संघले डिसिजन रिभ्यु सिस्टम (डीआरएस) प्रविधिको प्रयोग गर्ने तयारी गरेको छ। डीआरएसको प्रयोगले अम्पायरका निर्णयलाई पुनरावलोकन गर्न सहज बनाउनुका साथै खेलको प्राविधिक पक्षलाई थप प्रभावकारी बनाउने विश्वास गरिएको छ।
आईसीसीको मान्यता, लिस्ट ‘ए’ को दर्जा र डीआरएस प्रविधिको प्रयोगले यसपटकको एनपीएलको प्रतिस्पर्धात्मक स्तर थप उकास्ने अपेक्षा गरिएको छ। प्रतियोगिताको व्यवस्थापनदेखि प्राविधिक पक्षसम्म सुधार गर्ने प्रयासले नेपाली क्रिकेटलाई अन्तर्राष्ट्रिय स्तरमा थप स्थापित गर्न सहयोग पुग्ने विश्वास लिइएको छ।
एनपीएल सिजन–३ का लागि भइरहेको तयारीसँगै टुर्नामेन्ट डाइरेक्टरको जिम्मेवारीमा रहेका क्यानका केन्द्रीय सदस्य धीरेन्द्र साउदको भूमिका पनि महत्त्वपूर्ण रहने देखिएको छ।
